थूं
म्हारै व्हेणै रौ आधार-
आधी सामरथ
आधी निबळाई
जीवण रौ आधौ सार
थूं पसर्योड़ी कंवळी माटी
तालर में पांघरती
काची दूब रै उणियार
रूंखां री लीली ओप
थूं आभै री पुड़तां में तिरती बादळी
कांठल में काटकती-खिंवती बीज
धोरां अर चरणोयां माथै
धारोळां औसरतौ ठाडौ नीर
थूं नेह सूं भरियोड़ी नाडी/बावड़ी
थूं विगतां अर गीतां री आधी बात
वौ आधै हेलै सूं पैली आवणौ।
वा माईतां री ऊंडी झीणी सीख
अगनी री झाळां तपियोड़ी कंचन-कांमणी,
ऊमावै हांकरती नुंवी जिनगाणी रौ बोझ
ओकलियां उतरती आई
हेताळू रै आंगणै —
सांभी थूं अबखै जीवण री ढीली डोर
आबळ बंधाई माठै मारणां
अंधारै जगायां राखी आस
पोखती रैयी बीखरतै कुळ रा कायदा।
बरसां अर ऊमर री आडी घाल
थूं कठीनै सिधाई सोरठ-सोवणी
कठीनै अदीठ व्हियौ थारौ आघौचार
क्यूं लागै बिलखी तरुणा पै तीजणी।
क्यूं बधतौ लागै
पगां हेठली जमीं माथै भार-
—आ म्हारी मांयली मार
थूं किण करमां सूं बणगी म्हारी कांमणी।
धरम री पोथियां कैवै
थूं बणगी मिंदर री पूतळी
सरधा अर भगती में थारी
बुझगी अंतर-जोत
माळीपानां में छिपग्यौ धारौ उणियारौ,
ख्यातां में सोध्यां
लाधै न्यारी ई साख
रीत रा गीतां में चावौ रूसणौ —
किण दावै अंगेजूं थारी आंण
किण बूतै बंचावूं ऊघड़ती आबरू
म्हारी बाथां तांई पूग
थूं कठीनै अलोप व्हेगी नार
थनै सोधतौ भटकूं म्हैं ऊजड़ उभारणौ।
औ च्यारूंमेर
हाकां-दाकां हालतौ संसार
आ समदर में हिबोळा खावती
बेपतवारी नाव
औ बेकळू री थाग में
ऊतरतौ अबखौ पंथ
आ काळ सूं कूटीजिड़ी भोम
औ टोपां-टोपां सांगळतौ
अखूट जुलमी अंधारौ
आ सूंसाड़ा करती रात
औ आंधी अर बतूळां सूं
बाथेड़ा करतौ म्हैं:
म्हारा पगां पूगती आव
म्हारी मांनेतण।
अंतस में अंगेज
ऊंडी दाभ —
— गाज!
के बदलै ऊजड़ रौ आगोतर —
जिनगाणी रो सुरंगौ बाजै साज
सिरजां सांसां में नुंवी जीवारी!
