इण धरती पै
खुसी रा बाग उगावणिया
ठोकरां में पड़्या
दो रोट्यां खातर तरसै
ताकतवर
निरबलां री पीठ में
विश्वास रा छुरा खोबै
इण देस रा रूखाळा
टाबरां रा आंसू
पौछणै री ठौड़
नसे री गोळ्यां, भांग री मिठाई
अर
नसे री सिगरेटां रा कारखानां चलावणियां रा
रूखाळा बणै।
नसो करणियां री
लाइन लाम्बी हुण लाग री है
देस री नैतिकता
बांग घालण लागरी है।
राज रा नसेड़ी
मिनखां रा गाभा
उतारणै में सान समझै
मां रै सीनै पै
जूत्ता सैती नाचै
बाप बापड़ो बण्यो देखै
खुशी रा बाग उगावणिया
अनीत रै
पगां तळै दबै
इण देस रा भाग्य विधाता
टी.वी. पै
सौ क्यूं देखण लागर्या है।
नौजुवान लाइन में खड़्या
कदै तांई सै'न करैला?
खुशी रा
बाग लगावणिया
दो रोट्यां खातर
कदै तांई उडीकैला?
नसो मूंडै बोलै
मिनख भचभेड़ी खावै
नैतिकता री बांग देवणियां
आंख्यां भींच राखी है
मिनखां में चेत्तो आर्यो है
इण धरती पै
नूंवो सूरज उगण खातर
बगत करवट लैण लागर्यो है।
इण देस मांय
नूंवां समीकरण बणण लागर्या है।
