एक दिन स्हैर री सड़क माथै
म्हैं वो ईज घोड़ो देख्यो
जिको कदैई 'ट्यूरिन हॉर्स' मांय हो!
उणरी आंख्यां मांय वो ईज सागी दुख हो,
जिको नीत्शे नै लाध्यौ
वीं दिन, जद वो
घोड़ै नै गळै लगायो!
अबै वो घोड़ो
म्हारै स्हैर री सड़कां माथै रोज तांणै
नवी-नवी गाडियां
साथै तांणै
पीड़ रा सगळा सवाल।
उणरै मोरां माथै है
पीढ़ियां रौ बोझ
अर बागडोर सूं बंध्योड़ो है
अस्तित्व रो रहस!
म्हनै इचरज है कै
कांईं ओ ईज घोड़ो है वो
जिको केई दिनां तांईं जीवतो रैयो
बेला तार री फिल्म मांय?
या पछै ओ कोई दूजो घोड़ो है
जिको हरेक स्हैर मांय लाधै।
जीवै हरेक जुग मांय आपरी जूण।
