हूं इण गीतां नैं सुणतो रयो
जिका हरखीली पीढ्यां रा जस गावै,
बेगी ही आवै...
मोटा अर चिलकणा रोसन सैरां में
बांरा अणथक्या जबरा हाका सुणावै;
हूं इण गीतां नैं सुणतो रयो जिका घोसणा करै
कै सोनल दिनां री ओखा आवै
कारखानां री रागां में, फौलाद री गूंजां
अर चीरती करोतां धर्रावै;
जोवतो म्हारै साथी नैं लाल चुट्ट फौलाद ढाळतां
आकार प्रकारां में,
भावी रा चमकता ऊजळा सपनां म्हारै
नैणां सामां छाया विचारां में।
अर हूं जाणूं जगत रो बुधबळ
बींरै भारी हथोड़ै सागै बधतां
बीरै सबळा अर चतर हाथां में
बांरी अणथमी रमतां।
ज्यूं ई गाजतो हथोड़ो फौलाद कूटै
सदा बधती ताकतां,
बियां ई हरख ओ उदास सैंसार दीपावै
घणी चमचमावती रोसन्यां।
बै गाईजी ही म्हारै तणी, अेक रूड़ै
अर सानदार गीत में,
निरभै, लीलै गजीहाळै लुहारां गायोड़ी राग
लाखूं जणां री जबरी जीत में।
लड़त री लूंठी पुकारां सूरज अर जिनगाणी रा
गीतड़ा बां गाया।
अर बै गीत ईसकै-भर्ये भागां निरभै
गूंजती ललकारां भाया।
