बास- बास में हेलो पाड़
धूड़ी-मोड़ां हेलो पाड़
मेघा राग उगार रे, घर-घर हेलो पाड़ रे!
इंदर आज पखार
इंदर आज पखार म्हारा बीरा
फिर-फिर हेलो पाड़ रे!!
आभौ उमस कसीजैला
बादळिया परसीजैला
थूं खुरपा कसी संभाळ, ढांढां नै टिचकार
भाज्यो खेतां चाल रे!
सिणिया बूझ ऊपाड़
सिणिया बूझ ऊपाड़ म्हारा बीरा
माठां नै मचकाव रे
घर-घर हेलो पाड़ रे!
छांट्यां छिर-मिर नाचै है
हिरण्या-मोर कुळाचै है
थूं पग-पग माटी बीज, लै गोफणिया साध
मेड़्यां खड़ो रूखाळ रे!!
रोटी-राब मठार
रोटी-राब मठारा म्हारा बीरा
भरी डकारां गाज रे
घर-घर हेलो पाड़ रे!
सुण रमझोळां बाजै है
घूमर रमती लाजै है
थूं कोछा ऊंचा टाण, उठजा ले हूंकार
ले लारै परवार रे!
पाकी फसलां झाड़
पाकी फसलां झाड़ म्हारा बीरा
छाट्यां भर-भर बांध रे
घर कोठां में धान रे !!
मन री अमी पकीजी है
हरिया-टांच मतीरां में
बासां-बासां हेलो पाड़
धूड़ी-मोड़ां हेलो पाड़
पंचायत री चौकी बैठ
मिसरी-सी गिर बांट रे
पांणी पी'र डकार रे!
घर-घर हेलो पाड़ रे, फिर-फिर हेलो पाड़ रे!!
