ओ सावण रा सजळ मेघ
ओ प्रेमिल घन चितचोर
थूं तो बरस बरस
बरसाळ रै भादो रा भूपाळ
सगळा खौलो बंध
थारो घणों घणों उपकार
चंचळ - चपळ खिंवै बीजळी
घिर्यौ घोर अंधार
एकलो मन डरपै कांपै
खोवै धीर अपार
बरस-बरस बरसाळ
थारो घणों घणों उपकार
बलिहारी वसुधा घणी
मुग्ध हुया मन प्राण
इमरत निरझर थूं झरै
छूटे म्हारा दिग्दिगंत रा त्राण
थूं तो बरस बरस बरसाळ
थारी निर्मळ जळ री धार!
बणि मोरचंग काया म्हारी
थिरकै दे दे ताळ
हरिया हिवड़े रा संताप
थूं तो बरस बरस बरसाळ
थारी इमरत रस री धार!
