बापू काम पर गया पछै
बारली कोटड़ी सूं
कविता री किताबा चुरा’र
पढणो सीखती
अर कवितावां बांचती पाण
चोरी करी पण मैं चोर कोनी ॥
मां जद नानेरै चली जांवती
बी’री सिलाई मसीन सूं
गुडियाँ रा गाभा-गैणा-गाठां सीवतीं बगत
चोरी करी पण मैं चोर कोनी ॥
तिवारां पर इस्कुल जाणै रै बहानै
भायल्यां सागै मांडणां मांडता-मांडता
मेन्दी री कलाकारी सीखती पाण
चोरी करी पण मैं चोर कोनी ॥
छोरै बीरै नै खिलावण रै बहानै
बुआ, चाची, ताईं सूं अर साथणियां सूं
किरोसियो, सिलाई, सूटर बणणो सीखती बगत
चोरी करी पण मैं चोर कोनी ॥
म्हारै घर मांय कोरी पढणै लिखणै री इ’ज
आजादी ही, पण
अे सारी कलावां सीख’र
आज म्हारी, ओलखाम बणी है॥
माणक मोती मूंगा मिलग्या आंगण गांव गुवाडा में।
म्है मगरां रा कछुवां भाज्या, खरगोस्यां रा पाळा में ॥
ठगी छळावां आवै कोनी
जिम योगा मन आवै कोनी।
ढाण्डा ढोर टोरतां टिपतां
मोरनिंग वाक पोहावै कोनी ॥
कस्सी, खुरपी हाथ दंताळी, थाक्यां नहीं निनाणां में।
म्है मगरां रा कछुवां भाज्या, खरगोस्यां रा पाळां में॥
छ्याळी गायां भैंस चरावां
इस्कूलां में आंक मंडावां।
घर में गोबर-भारी करतां
करां सवारी दो-दो नावां॥
नाडी नाळा ताळ तळावां, बिरखा जोर ऊफाणां में।
म्है मंगरां रा कछुवां भाज्या खरगोस्यां रा पाळा में॥
मोठ बाजरो फळी फोफळ्या
काचर बोर मतीरां सीर।
बर्गर पिज्जा परै बठावै
छाछ राबडी म्हारी खीर ॥
घर में ऑफिस ऑफिस में घर, ऊंच्या फिरां सिवाणां में।
म्है मगरां रा कछुवां भाज्या, खरगोस्यां रा पाबां में॥
