कोई पारकौ
काटै नी आपां री जीभ
हाँ, आपां ही इणनै घसां
बरछी बरगा
परदेसी बोलां सूं
आं बोलां रा मार्या
आपां लोगां रौ जमीर
आपां री औकात
आपणी ताकत
सा अकैकारी लखावै
आज री आ घड़ी—
घणी अणखावै
पण परायछित कोरौ कंई काम आवै?
कुण टोकै भाया
थांनै थांरी
दूध
पूत
सपनां
लोर् यां
गीतां उमगती
सजळ-निरमळ
सिरजणवती
लोक वाणी रौ मिठास घोळतां?
काळजै में फेरौ कांगसी
करो साच रौ सामनौ क’ आपां गिरवी मेल राखी है
आपणी जबाना
आ खरी बात खारी जहर लागैली किणी नै?
जिण धरती रा लोगां
आपरा कान
आप रौ दिल दिमाग अडाणै मेल राख्यो है
घण सोच। उणा री रीस मरगी
दफणीजग्यौ उणा रो रोस।
हाथ कमाया कामड़ा
किणनै दीजै दोस?
