हिवड़ै री ऊंडी सूं ऊंडी
एक ई वाणी है—बाप
संसार रो आदू आखर—बाप!
हां म्हारो बाप
म्हैं बानै कंवर सा कैवतो
म्हारा कंवर सा
करड़ावण री कीरत
ठाकरी ठसको
सूरजवंसी सारू
अर छतरी धरम रा छतर चंवर हा
म्हारा कंवर सा
म्हारा कंवर सा खांसता
खांसता खांसता उळझ ज्यावता
(पण) परताप अर दुरगादास री
ख्यात-बात नै
तलवार-भालां री तीखी धार पर
तोलता-तोलता बोलता ई जावता
खांसी खिसक लेती
म्हारा कंवर सा ऊंचो सुणता
पण सुणता जद, सांची ई सुणता
कोई रै लूण लागै, मिरच लागै, तो लागै
काणां नै बै कदेई
नैण सुख कोनी-कैयो
म्हारा कंवर सा
ढाणी में बैठ्याई
सिंवाड़ै री रूखाळ में
आंख्यां सूं झळ काढता
देस धरम रै खातर
मरण व्रत धारता
पण दीसतो बीस पांवडा ई कोनी
म्हारा कंवर सा
चौरासी बरसां में ई
चौरासी लाख जूण रो मरण जाण लियो
अर खोळियो बदळणो ठाण लियो
म्हारा कंवर सा
म्हारै नौकरी पर जांवती वगत
म्हारै माथै पर हाथ फे’र
दूर-दूर ताईं
गळगळी आंख्यां सूं
घणी ताळ झांकता रैवता
पण अब म्हैं
रोवणी आंख्यां सूं झांकतो ई रैवूं
अर झांकतो ई रैस्यूं
म्हनै दीख ज्यावो नी
म्हारा कंवर सा।
