भावनावां रा हिलोळा
ढावा माथै आवै
अर पाछा बावड़ जावै
पण, कुछेक भाव
लांबी बेळ्यां ताईं
जिनगाणी में काई री दाईं
जम जावै
अजै ताईं आं भावां नैं
कुण अंगेज पायो है।
किणी सूं चावना करनै भी
घिरणा नीं व्है
किणीं सूं चायां भी
हेत नीं व्है
अै मन रा भाव
अणदीठ व्है
कदै तो फेफड़ां रै लारै
हिरदा मांय जम जावै
कदै पांगळा बणनै
थम जावै
किणी सारू पुहप
तो किणी रै वास्तै कांटा
अणजाण्या ही बण जावै।
आ मन री गत
घणी निराळी है
इण माथै
किणी रो बस कोनी।
