खून सींचियां फूटी कूंपळ
परसेवौ पी बूंटौ फळियौ
म्हैं जाण्यो आ म्हारी मैणत
फूलां-फळां मजूरी मिळसी!
आ कद जांणी—
तन विसरामां थपकी देतां
मन नींदड़ली पोथी पढ़तां
रात आंगणै
अंधारै री लगा निसरणी
चोर चांदणौ यूं कर दैला!
निकळूंला जद सोधण
म्हारा रगत-पुसप नै
फळ-रस बदळ्या
परसेवा नै
तद पाँखड़ियां
बिखर्योड़ी मिळसी
रगत पुसप री
सूखोड़ा छूंतरका मिळसी
रस रै फळ रा।
कद जांणी ही—
रगत-पुसप रौ रगत
जमानौ यूं चूसैला,
परसेवौ म्हारौ यूं चोरी व्है जासी।
