यूं जुमला नीं उछाळो
फिल्मी अदावां सूं
नीं घड़ो नित उठ
नुवां-नुवां सम्बोधन
नीं बांधो पाळ
मेरी झूठी सांची बडायां री
बंद करो मेरै तांई
आवण वाळा झूठा बहाना।
डिगमिगा रही मेरी निष्ठा
डरा रैयो थारो बुण्यो सुपण-जाळ
खोखला उधारी हरफ
ऊंची दुकानां खरीद्यां
सोवण-मोवण कार्ड
सुभकामनावां रै नांव
चिलकती पन्नियां
सलीका सूं
सज्या-संवर्या उपहार।
थारै हाथां
बार-बार
छलतां-छलतां
हारगी मेरी हिम्मत
इण सै री आड़,
मैं अेक औरत
घणी डरूं’क
फेर न छली जाऊं
किणी फरेब सूं।
