गाडिया लुहार रा
भूत भराड़ा गाभा सा आभा तळै
नदी रा गोड़ां पर उबो
अणमणो सो एक मांदो गांव
मून री पड़तां में दबेड़ो
मैं!
कालबेलिया री छावड़ी सा घरां में
पानी री तूळी सा मिनखां रै
मनहीणां उणियारा पर मंडेड़ा
भूक रा अैनाण
मौत री पड़छैयां सूं भयाणी
गळ्यां में उबा
छिया बिहूण खिजूरां रा रुंख
ओळसीड़ा मांय
छिपकल्यां रो बैम
सिंझ्या रा
काजळ्यां पोमचारी
घड़ उधेड़ तांई
बैठेड़ा जाबुआं परली सळां
चोगंणी बध ज्याय
रोजीना—
फाइला रा फीतां सूं
भाजता दिनां री अचपळी टींगरी री
तिगस करतां
जीवन री गाड़ी अधवाड़ै आयगी
मैं—
खजूरा रा रुंखतळ
रिजाई रो रीतो खोळो ओढ्यां
आस्था बिहूण पड़दां रो
बखियो उधेडूं
कूणा में उबा—
ईस तूठेड़ा मांचा-सा सुख
ऊपरला सांस लेती भावुकता रा
नैणां रा भुंइजता कोया
पांगळी प्रतिभा रो
खूंवू पकड़्यां
पगोतिया पर चढूं
मन री मेज मांथै
सोसनी सुपनां री
सिन्नू री साधां री
अणथाग पाण्डू लिप्यां र
दीवळ लागगी
मैं कोरपाण ओळ्या पर
सबदां री टीपणी मांडू
तिरसा रा गूंगा अैनाणा नै
भासा सिखावूं
अब ओ गांव छोड़द्यूं
नीं
इण मांथै फेर विचार करस्यूं
पण पैली
मोमजामा रा पड़दा रा
बखिया उधेड़ल्यू
आस्था बिहूण भीतां रो
डगळ्यो डगळ्यो खिडाद्यूं
