गोरी-गोरी कूंकू वरणी,
जलम देवतां रातादेई सुरग सिधारी!
सात्यूं घुड़ला जोत,
निकळग्यो रथ में म्हारो जळहळ जामी
सोन मिरगलां री सिकार में
हाय, जलम लेवण री पीड़ा
हाय, जीव जीवण री पीड़ा
पीड़ मौत री सू राई भर ओछी कोनी!
छांव सोधतां चार पौर जीवण रा बीते
नित रो जलम लेवणो, तपणो,
म्हैं अणजाणी जूण पराई जीव रह्यो हूँ!
बगत लांघ या बात बिचारूं-
अमर भामणी रैणादे तो
बीजां भरियो हाथ खोलियां
म्हारो ई जीवण जीवै है।
ओ जीवण कोई रो कोनी
दूजां रो है-
जिको जूण आपां री जीवैः
म्हैं जिणरै काळै केसां में लुक जाऊ हूँ
मुगती बण म्हारी म्हैं जिण में बुझ जाऊं हूँ |
