लोकतंत्र रा ऊंखळां में
पोलतंत्र रा मूसळां सूं
वापड़ी रूड़ी रूपाळी
जिनगाणी नै खांड-खांड,
लूण-मिरच पीसवा री
खरड़ कर दीनी
और खोद्यां जा खाडा
निकळ्यां जा धूळो?
लोग-बाग न्हाळता जा
गाबड़्यां हलावता जा
फूसर-फूसर करता जा
पुलिस रो सिपाही देखै
सिनेमा री बात करवा लाग जावै
बो गयो नै पाछो बो ई पैलां आळो ठाठ।
रोवतै टाबर रै चूंकणी रो इन्तजाम
बळी-जळी बाटी रो ठिकाणो हमाम
ना’रां रा पींजरा
मूंडा फाड़्यां करै सलाम
आज हाजरी कालै
आपणै तो यूं ही चालै
अंवळी घट्यां रै पाणी सब ठामड़ा
अेंठवाड़ा कर दीना।
