भारत माता रो समर संदेसो ल्याया हां-
जे रण-खेतां रै मारग कोई चालै तो ।
आयो मरण-तिंवार, बधाई जजमानां नै
जे माथां तणी तिंवारी कोई घालै तो !
जस-कीरत री ख्यातां हंदा बहीभाट हां-
म्हे बिड़दां री पोथ्यां बांचण नै आया हां !
वाणी रा वरद सपूतां अर हलकारां नै-
उण वाणी रा वाहन, जांचण ने आया हां!
'बै देई-देव हिवाळै रा सै कठै गया'-
प्रो अणचीत्यो समचार चराचर पूछैलो!
बो 'मेघदूत' रो ‘यक्ष' कठै जे भेट्यो तो
अलका कीकर लुटी'-सरासर पूछैलो।
म्हे नळ राजा रो भीखो प्रांख्यां देखणिया-
उण दमयन्ती रो दुख लाटण नै आया हां !
अब मानसरोवर रा मोत्यां नै तरसणिया-
म्हे आंसूड़ां रो रिण बांटण नै आया हां !
ल्यो सत्य अहिंसा रै पाणी नै परखणिया
बै सींवां री मरजाद उलांघै परदेसी !
पण चीणी गरब-गरूरां नै ओ पतो नहीं-
अे धणी रगत सूं सातूं समदर भर देसी!
म्हे राम-कृष्ण री पगथळियां रा परम पवित्तर
'पगल्यां' री माटी चाटण नै आया हां !
पाबासर रै पावटियै रा राजहंस हां,
म्हे देसूंटै रा दिन काटण नै आया हां !
बैरयां रा कटक उछेरणिया अर जूझ मरणिया
मानधणी नर-नाहर मिलणा ओखा है।
हाका कर-कर गाल बजावणिया लोगां सूं
बै मरण-पंथ पर कूच करणिया चोखा है!
मीत-कुमीत जठै घुळमिलिया भीड़भाड़
म्हे आज खरा-खोटा छांटण नै आया हां।
म्हे राज हंस-कळ-हंस कहीजां, नीर-छीर रो-
न्याव करण मिस देसाटण नै आया हां
