भूखो-तिस्यो बगै भीखलो
मैणत करणै में पाछ नीं राखै
तगारी ढोतां-ढोतां
आईठण पडगी कांधै में
एडी में बिवाई पडगी
फाट्योड़ी जूती पैर्यां बगै।
बींरै परसेव रो हक अमरियो हजम करै
देखतां-देखतां अमरियै री हवेली बणै।
चून्यौड़ा मिनख
सामाजिक न्याव री बातां करै
सैंग जाणै बदळाव रै वास्तै
भीखलै रै नेता नै
खरचो-पाणी किंयां मिलै
ऊंधै माथै बैठ्यां पछै
भीखलै नैं कुण जाणै?
भीखलो भूखो-तिस्यो दिन काटै
सामाजिक न्याव री बातां करीजै
बातां बिचाळै अमरियै री लछमड़ी
पड़ी-पड़ी बधै
झूठ-सांच री ताकड़ी में
झूठ रो पलड़ो भारी पड़ै
राख तळै खीरा सुळगै
इतियास साख भरै
भूखा-तिस्या, सांचा जाग उठै
जणा क्रांति होय'नै बदळाव हुवै।
