साच है कै जद ई मांगां हां पड़ूत्तर आपां
खुल जावै है काळी किताब आपां रै सारूं; जेळ-खानौ।
चमड़ा रा बेल्ट कस लेवै है बाजुवां
तूटा हाड
खून
पण विस्वास राखौ
टाबरां, आपां देखांला चोखा दिन
देखांला आपां ऊजळा दिन।
खेवांला आपां तेज नावां अपणी
खुलै समंदर में
तिरावांला उणां नै,
सोसनिया,ऊछळती चमकती छौळां माथै।
‘जेळ सूं लिखियोड़ी चिट्ठियां
सै सूं रूपाळौ समन्दर वौ है
जिकै नै आपां देख्यौ नीं है
सै सूं फूठरौ टाबर
अजै तांई नीं व्हियौ है मोटियार
सै सूं आछा दिन आपां रा
वै है जिकां नै आपां जियां नीं है अजै तांई
अर वै बेपनाह चोखी बातां
जिकौ सुणावणी चाहूँ हूं थन्नै म्हैं
अजै कैवणी बाकी है!
