बिचारां रो अेक भतूळियो
चारूं मेर चक्कर लगाय’र
पूछण वाळै चिन्हां नै बिखेर ब्हीर व्है
माटी रै सागै रिगदोळियोड़ो लोही
टाबर-टींगर, मोट्यार रो भेद नीं बतावै
अेक सिरसो लोही
काची कचनार ज्यूं जवानी में हबोळा खाती
कामण रो है
का मसाणां नै अडीकता बूढ़ा ठेरां रो है
का हांचळ चूंगता
रूपाळी देह वाळै लाडेसरां रो है
जकां री काची मौत रै मूंढै में
दूध रा दांत हाल तांईं चिळकै
बाळपन, जवानी, बुढ़ापो
सगळा लोही री जात में रळ-मळ ग्या
गळी रै नुकड़-नुकड़ माथै कुत्ता भूंक रह्या है
भूंकण रो कांईं, हंस रह्या है
आज कित्तां रो हिड़दो चालणी बणायो
कित्ता फूलां नै मसोसिया
मौत रै खातै में कित्ता नाम जमा करिया
लासां रा बोपारी लासां री घणी फसल देख’र
उच्छब मना रह्या है
दरद आस्थावां अर अमूज्योड़ा सपनां री
पड़त मिला रह्या है।
का'ल तक ओ अेक गांव हो
इण रा पिणघट, पिणहार्यां
मुळकती काया, उमड़तो नेह
इण रा मेळा, मगरिया
नान्हा मदरसा
फूलां ज्यूं कंवळा टाबर
जवानी रा झबळक,
ढोला-मारू रा गीत
मिंदरां रो चढ़ापो
मसीदां री निमाज
इण रा ईद, रोजा, मोहर्म
पण आज—
आज ओ अेक अणबळियो मसाण है
अण खुदी कवरां रो बसेरो
गीध, कागलां रो डेरो
बांरै भाई पै रौ भेळाव
चेचक चाट्योड़ी सड़कां सूनी है
मौत रो राती बासो लांबो होय रह्यो है
सूंसाड़ करती अेक हवा मसकर्यां करै
कठै बै झूलणा? कठै बै गोरड़यां
कठै बै टाबरां री टोळी री मनवारां
डूंगर माथलै मिंदरां री गूंगी घंट्यां
मांय री मांय रळी रा गुटका पीवै
जिन्दगी रा दुखता पग थमग्या है
हाथां में बांइटा चालण लाग रह्या है
मिनख पणै रा कांधा लुळण लाग रह्या है
नीमड़ा री ठंडी छिंयां
ठंडी लासां माथै छतर करै
गिंध सूं बासती भभकती हवा
आज अमूंजती फिरै
पण अडीक गैरी है
इणगी बिणगी वाजतो बायरो
मिनख पणै रो संदेस गांव-गांव पौंचाय रह्यो है
लोही रंगियोड़ी धरती माथै
नुंवा बीज पड़ रह्या हैं
छेकड़ तो मौत रो मजमो खिंडसी
आखरां री जलम घूंट पी’र जिन्दगी
पगां चालसी’ज
अंधारै रो अंतकाळ
छेकड़ तो आसी’ज
आपां मिनख मार मिनख तो नीं हां?
तो पछै आ गैलाई क्यूं करां?
आपरै मांयलै राखस रा नख क्यूं बधावां?
क्यूं बींरा दांत लोही सूं रंगां
मारणो व्है तो बीं नै ही’ज क्यूं नी मारां?
आओ मिनखाचारै रा नुंवा चितराम बणावां
नुंवा सूरज घड़ां
जद तांई मिनख-मिनख रै बिचै
फैलियोड़ै अंधारै नै
सुरग बिसाई नीं लागै
आपां-आपां रा सूरज घड़ता रां
चितराम बणावतां रां
आखरां री चढ्यां
रंग रंगीलै गाभां माथै जड़तां रां।
