करूं हूं खारिज
म्हैं खुद नै
अर इण तर्यां
म्हैं खुद नै समझण खातर
फेर रैवूं त्यार
हर बार।
म्हारो रेचन
हुयो है हर बार
हर बार म्हैं आई हूं
जूण में
लेय'र नूंवा-नूंवा सरूप।
म्हारो औ रूप नीं है
म्हारो तो कोई रूप ई नीं है
स्यात इणी खातर नीं पिछाण सकूं
नीं रैवै याद
म्हनै म्हारा रूप
नीं रैवै गीरबो
नीं रैवै पिछतावो
जद कीं हो ई कोनी
तो फेर हुवण रो कांई गुमेज?
हर बार करूं खारिज
अर हर बार म्हनै मिलै
कीं नूंवो
इणी नूंवै नै परोटती, सांभती
फिरूं आखी जूण
जूण रो साच इतरो
लोग जीवण अर मिरतु में देखै
म्हैं देखूं
नूंवा गाभा म्हैं अपणै आपनै
नूंवा गाभां रो कोड किणनै नीं हुवै
म्हैं भी फिरूं कोडांवती
कोडीजती
गुडली दांई
जकी हरखै नूंवी घघरी पैरनै
रमूं रमतिया
घालूं घूमर
हर बार
बार-बार।
