अरज लगावां सुणियो बापू!
करै बीनती थांरी धापू
हीरा निपजैं रेत में
पाछा चालो खेत में!!
कांईं रखियो इण सै'रां में
सांस न आवै इण घैरां में
रमै हीवड़ौ हेत में
पाछा चालो खेत में!!
कांकरियां री जंगळायत में
धुंधळा आखर इण आयत में
रहवै न माणस चेत में
पाछा चालो खेत में!!
मिनख, मिनख न जाणै कोनी
मतलब सूं मानवता बोनी
सांच नहीं अपणेत में
पाछा चालो खेत में!!
खेत आपणो गांव आपणो
नीम खेजड़ी ठांव आपणो
गीत गवैं समवेत में
पाछा चालो खेत में!!
