चांदणी रूपाळी, उतरी चांदणी!
चांदणी जद उतरी कांकड़-कांकड़ खेत-खेत,
बाथां भर-भर मळक्या काळा ढेकळ भूरी रेत।
उतरी चांदणी!
चांदणी जद उतरी सरवरिया की तीर-तीर,
झळमळ का तारां सूं जड़ग्यो नरमळ जळ को चीर।
उतरी चांदणी!
चांदणी जद उतरी बादळिया की कोर कोर,
रूपां वरणी मूंडा होग्या, काजळ बरणी मोर।
उतरी चांदणी!
चांदणी जद उतरी बछटी गणगोर्यां कै गांव,
कंवळ-पांख होठां पै डघड़यो सांवरिया को नांव।
उतरी चांदणी!
चांदणी जद उतरी गीत रचण्यांन की पोळ,
रागण्यां का पग मैं बंधग्या गीतां का रमझोळ।
उतरी चांदणी!
