मेहता जी ओ मेहता जी
किण गळी में रै’ता जी
पाणी में थै पतंग उड़ावौ
ओर हवा में बैता जी
मेहता जी ओ मेहता जी
किण गळी में रै’ता जी
हगड़-बगड़ में गाल बजावौ
लोगां ने कांई कै’ता जी
मेहता जी ओ मेहता जी
किण गळी में रै’ता जी
समंदर में थै मोर नचावौ
परबत धूणी देता जी
मेहता जी ओ मेहता जी
किण गळी में रै’ता जी
आभा माथै बाग सजावौ
जबरा थै करमैता जी
मेहता जी ओ मेहता जी
किण गळी में रै’ता जी
चारूं कानीं लोक लजावौ
किण रौ काईं लेता जी
मेहता जी ओ मेहता जी
किण गळी में रै’ता जी
जग आखै नै राम भजाऔ
संत व्हिया के नेता जी
मेहता जी ओ मेहता जी
किण गळी में रै’ता जी
मरी माछळी खूब फंसाओ
वाह सपूत वाह बेटा जी
मेहता जी ओ मेहता जी
गळी-गळी में रै’ता जी
भायां ने थै खूब लड़ावौ
रंज नै करौ फजीता जी
मेहता जी ओ मेहता जी
नाना रै घर रै’ता जी
नानी थांनै लाड़ लडायौ
घर रा करौ पलीता जी
मेहता जी ओ मेहता जी
किण गळी में रै’ता जी
