नवै कलाकारां नै म्हैं पूरौ-पूरौ बढावौ देवूं

 

राजस्थान री धोरा धरती में यूं तो अणगिणत कलाकार हुया है, जिका न्यारी-न्यारी कलावां नै पोखी है अर कलावां नै नवा आयाम दिया है। संगीत अर उणसूं जुड़्योड़ी निरत अर गायन कलावां रै छेत्र में ई अठै रा कलाकारां खूब जस कमायौ। उणां री संख्या बौत बडी है। सो अठै उणां सब री चरचा नीं कर’र अेक इस्यै कलाकार री चरचा करीज रैयी है, जिकौ आपरी धरती री माटी सूं उपजण वाळै संगीत नै राजस्थान सूं बारै चावौ करण रै साथै-साथै विदेसां तकात में ई चावौ कर्‌यौ है। आपरै साथै-साथै आपरौ मुलक रौ नांव ई ऊंचौ कर्‌यौ है। आपरै साथै-साथै आपरौ मुलक रौ नांव ई ऊंचौ कर्‌यौ है। उण कलाकार रौ नांव है शंभुसेन।

 

बीकानेर जिलै री सुजाणगढ तहसील रै चरलां गांव में जाया-जलम्या शंभुसेन लारलै बौत लंबै बगत सूं फिलम-नगरी बंबई में रैय’र संगीत अर निरत कला रै छेत्र में सेवावां दे रैया है। आप नै केई नामी फिलम नायिकावां नै निरत सिखावण रौ जस ई है। तो ‘माणक’ रै पाठकां सारू प्रस्तुत है इण बार श्री शंभुसेन सूं करयोड़ी बातचीत। आ बातचीत करी है—श्री सत्येन व्यास

 

सत्येन व्यास : शंभुजी, संगीत रै साथै-साथै आपरौ नावं निरत कला सूं ई जुड़्योड़ौ है। तो, पैली तो आप आ बतावौ 'क दोनूं ई कलावां सूं आपरौ जुड़ाव किंयां हुयौ?

 

शंभुसेन : इंयां तो दोनूं ई कलावां अेक दूसरै सूं जुड़्योड़ी ई है। आ बात तो सगळा ई जाणै है 'क बिना संगीत रै निरत कला नीं हुय सकै। संगीत तो म्हारै घराणै में हौ ई, निरत ई म्हैं म्हारै पिताजी जमाल सेन जी सूं ई सीख्यौ। अेक जमानै में वां रौ फिलम-नगरी बंबई में डंकौ बाजतौ हौ।

 

सत्येन व्यास :  फिल्मी दुनिया में आपरौ आवणौ अेक संगीतकार रै रूप में हुयौ के किणी दूजै रूप में? म्हारौ पूछण रौ मतलब है कै आपरी फिलमी जिंदगाणी री सरूआत किण रूप में हुई?

 

शंभुसेन : आपरौ ओ सवाल घणौ महत्व राखै। बात सन् 1949 री है, उण जमानै रा मान्योड़ा फिलम-निरदेसक श्री केदार शर्मा अेक फिलम बणा रैया हा—‘शोखियां।' उण फिलम में पैल परथम में गीत गायौ। इण भांत फिलमी दुनिया में म्हैं अेक ‘प्ले बैक सिंगर’ रै रूप में म्हारी सरूआत करी। उणरै बाद बंबई में रैय’र म्हैं संगीत अर निरत री शिक्षा देवणी सरू कर दी। इणरै अलावा लगौलग स्टेज-प्रोग्राम दे-दे’र झड़ी-सी लगाय दी।

 

सत्येन व्यास :  संगीत अर निरत री शिक्षा देवतां-देवतां आपरौ जुड़ाव मंच सूं किंया हुयग्यौ?

 

शंभुसेन : सन् 1962 में म्हैं ‘मारवाड़ी सम्मेलन’ रे अेक कार्यक्रम में म्हारी कला-प्रस्तुति करी। उण कार्यक्रम में म्हनै जबरदस्त वाहवाही मिली।

 

उणरै बाद सन् 1965 में ‘हजारीमल सोमानी कालेज’ सारू अेक बौत बड़ौ कार्यक्रम कर्‌यौ। वो ई भरपूर सफळता हासल करी। आं रौ नतीजै ओ हुयौ 'क मारवाड़ी समाज छोटै-बड़ै मंच रै कार्यक्रमां सारू म्हनै बुलावण लाग्या। अर म्हैं मंच रै कार्यक्रमां में म्हारौ अेक खास मुकाम बणाय लियौ।

 

सत्येन व्यास :  मंच माथै दियोड़ौ इस्यौ कोई कार्यक्रम जकौ क थांनै ताजिंदगाणी याद रैसी?

 

शंभुसेन : बंबई रै ‘ब्रोबोर्न स्टेडियम’ में म्हैं अेक कार्यक्रम री प्रस्तुति सारू सोळै सौ लड़कै-लड़कियां सूं अेक बेले री ‘रिहर्सल’ करवाई, जिकी 'क अड़तीसवैं ‘इंटरनेशनल युकेरिस्टिंक कान्फ्रेन्स’ रै मौकै माथै सन् 1964 रै नवंबर म्हीनै में हुई। वा प्रस्तुति म्हनै ताजिंदगाणी याद रैसी।

 

सत्येन व्यास : आज तांई कित्तैक लोगां नै आप सूं संगीत अर निरत कला री शिक्षा मिली हुसी?

 

शंभुसेन : कोई पांच हजार रै लगै-टगै।

 

सत्येन व्यास :  निरत कला में आप जिका कलाकार त्यार कर्‌या, उणां में सूं कीं चावा नांव...?

 

शंभुसेन : यूं तो निरत कला म्हारै हाथां सूं केई कलाकार त्यार हुया, पण जिणां माथै म्हनै नाज है, उणां में हेमामालिनी, योगिता बाली, जाहिदा, सारिका, रजनी शर्मा, सोमा आनंद, लक्ष्मीछाया इत्याद नांव खास है।

 

सत्येन व्यास : आं कलाकारां नै ले’र निरत-नाटिकावां अर बेले ई करीज्या हुसी?

 

शंभुसेन : हां करीज्या, जरूर करीज्या। हेमा नै लै’र ‘मीरां का स्वप्न’, लक्ष्मीछाया नै ले’र ‘मेघदूत’, मनीषा नै ले’र ‘महारानी पद्मिनी’ अर ‘विश्वामित्र’ इत्याद प्रस्तुतियां करीजी।

 

सत्येन व्यास : हेमामालिनी जिस्यी कलाकार आपसूं कांई-कांई सीख्यौ?

 

शंभुसेन : कत्थक निरत! अर वो ई कोई च्यार-पांच साल तांई। हेमा अेक बौत ई अच्छी कलाकार है अर कला री पकड़ उण में गजब री है।

 

सत्येन व्यास : आपरै संगीत-निरदेसन में मोहम्मद रफी, महेन्द्र कपूर, लता मंगेशकर, आशा भोंसले, सुरेश वाडकर, चंद्राणी मुखर्जी, अलका याग्निक, अनुराधा पौड़वाळ, उत्तरा केलकर इत्याद अनेकूं गायक कलाकारां आपरी आवाज दी। आं पुराणा-नवा गायकां में सूं किणरी आवाज खास तौर सूं आप घणी पसंद करी?

 

शंभुसेन  : हरेक गायक री आपरी अलग-अलग साधना है, आपरा अलग-अलग सुर है अर गावण रौ आपरौ अलग-अलग ढ़ंग है। पण लता अर आशा री खासियत आ है 'क वे म्हारी लगन नै पिछाणै, अर म्हारै संगती में बंध्योड़ै गीतां नै उणी मुजब गावै जिण मुजब 'क फिलम गावण री जरूरत है। वे कवि री कल्पनावां अर संगीतकार रै सुरां नै भलीभांत समझै अर गीतां नै भावां रै मुजब आवाज रै माधुर्य में ढाळ’र गावै। इणरै अलावा अै  दोनूं आजकाल जिकी नवै संगीतकारां री बाढ आयोड़ी है, उणनै ई सैयोग दे’र फिलम-जगत री सेवा करणौ आपरौ फरज मानै।

 

सत्येन व्यास : आं दिनां आपरी ‘सेन डान्स अर म्यूजिकल स्कूल’ रौ काम किंयां चाल रैयौ है?

 

शंभुसेन :  ठीक ई चाल रैयौ है। लगन ले’र कोई ई नवौ कलाकार आवै तो उणनै म्हैं अै कलावां सिखावूं ई हूं। पण आं दिनां संगीतकार हुवण रै नातै, म्हारै कनै गायकी सीखण नै केई कलाकार आय रैया है। म्हारी तो सदीव आ ई मनस्या रैवै क जे किणी में लगन है तो उणनै पूरौ-पूरौ बढावौ दियौ जावै।

 

सत्येन व्यास :  आपनै आपरौ कार्यक्रम देवण रै सिलसिलै में विदेस जावण रौ ई कदैई काम पड़्यौ कांई?

 

शंभुसेन : हां, केई बार। म्हैं मोरिसस, बहरीन, पेरिस, डरबन अर दूजै ई केई देसां रै नगरां में भ्रमण कर’र उठै भारतीय संगीत रै प्रचार-प्रसार रौ काम कर्‌यौ है अर मौकौ मिल्यां भविस में ई करस्यूं।

 

सत्येन व्यास : राजस्थानी फिलमां रै संगीतकार रै रूप में ता आप नांव कमायौ ई है, हिंदी री कुण-कुण-सी फिलमां में संगीत दियौ?

 

शंभुसेन : हिंदी फिलम ‘मृगतृष्णा’ में म्हैं संगीत दियौ हौ, जिणमें 'क हेमामालिनी री मुख्य री मुख्य भूमिका ही। इणरै अलावा अेक और हिन्दी फिलम ‘बन्नो’ में संगीत दियौ। राजस्थानी हुय नै राजस्थान री सेवा कर सकूं, इण वास्तै म्हारै सामी राजस्थानी फिलमां में संगीत देवण रै सिवाय दूजौ कोई रस्तौ नीं हौ। ‘थारी-म्हारी’, ‘जेठ-जेठानी’, ‘भाई-भौजाई’ इत्याद राजस्थानी फिलमां में म्हैं संगीत दियौ, जिणनै लोगां खूब सरायौ। कीं और राजस्थानी फिलमां में ई संगीत देवण सारू प्रस्ताव आया है, उम्मीद है आवण वाळी कीं और राजस्थानी फिलमां में लोगां नै म्हारौ संगीत सुणण नै मिलसी।

 

वियां म्हारौ छोटौ भाई दिलीपसेन अर म्हारौ बडौ बेटौ समीरसेन मिल’र केई बडी-बडी हिंदी फिलमां में संगीत दियौ है अर दे रैया है, ज्यूं कै ‘सूरमा भोपाली’, ‘अंधेरगर्दी’ इत्याद।

 

सत्येन व्यास : राजस्थानी संगीत रै नांव माथै जिका कार्यक्रम आं दिनां देस-विदेस में हुय रैया है, उणां रै बाबत आपरा कांई विचार है?

 

शंभुसेन : साची बात तो आ है क राजस्थानी संगीत आपरी न्यारी अहमियत राखै। इणमें केई मीठी रागां है ज्यूं 'क सारंग, देस, मल्हार, सोरठ इत्याद। सही कलाकारां नै हाल मौकौ नीं मिल्यौ है। उणां नै मौकौ देवण रौ जिम्मौ राजस्थान सरकार रौ है। राजस्थान सरकार नै चाइजै 'क राजस्थानी संगीत रै नावं माथै भेज्यै जावण वाळै कलाकारां बाबत पूरी तपास करै।

 

सत्येन व्यास :  बंबई जिस्यै महानगर में जिकी संस्थावां राजस्थान री सांस्कृतिक सेवा कर रैयी है, उणां रा नांव बतावणा चावौला?

 

शंभुसेन :  क्यूं नीं! इंयां तो रोज अेक संस्था बणै अर बिखरै पण जिकी संस्थावां लगन अर मैनत सूं मिशन बणा’र राजस्थान री कला-संस्कृति रै छेत्र में काम कर्‌यौ है, उणां में ‘मारवाड़ी सम्मेलन’, ‘ग्रेजुअेट अेसोसियेसन’  अर ‘राजस्थान कला केन्द्र’ खास है, जिकी सन् 1974 तांई सक्रिय रैयी। अर ‘मारवाड़ी सम्मेलन’, ‘चूंदड़ी’, ‘देवतां’, अर ‘आथड़िया पण पड़िया कोनी’ जिस्या नाटक खेल्या।

 

‘राजस्थान कला केन्द्र’ सूं म्हैं अर म्हारा पिताजी जुड़िया रैया।

 

सत्येन व्यास : आप आपरै मुजब वे नांव बतावौ, जिका 'क बंबई में रैय’र राजस्थानी कला अर संस्कृति रै बधापै सारू काम कर्‌यौ?

 

शंभुसेन  :  पं. इंद्र, पं. मुरलाधर दाधीच, जमनालाल पचेरिया, शेखर पुरोहित, सत्येन कप्पू, मास्टर छैलाराम, सरस्वती देवी, पं. शिवराम, गुलाममोहम्मद, जमालसेन, महिपाल, भरत व्यास, ब्रजमोहन व्यास, मिश्रीलाल, पं. मधुर, मधुकर राजस्थानी, शिवराम पुरोहित, मदनलाल जालान, कैशाश अग्रवाल, पं. दिवाकर इत्याद।

 

सत्येन व्यास : आजकल तो. चौफेर टी.वी. ई टी. वी. छायोड़ौ है। इणरी धारा में बैवण रौ काम पड़्यौ के नी?

 

शंभुसेन : क्यूं नीं। टी.वी. सीरीयल ‘तेरह पन्ने’— जिणमें 'क हेमामालिनी काम कर्‌यौ—रै तीन हिस्सां— ‘पद्मिनी’, ‘कैकेयी’ अर ‘पन्ना धाय’ में म्हारौ ई संगीत हौ।

 

राजस्थानी पारिवारिक मासिक ‘माणक’ रै पाठकां नै आप कोई बात कैवणी चावौ तो...?

 

राजस्थान री संस्कृति रै प्रचार-प्रसार सारू आज फिलम अंक सैं सूं सबळौ माध्यम साबित हुय सकै। अर दूजी बात—राजस्थान रा लोग, चायै वे आपरै प्रांत में रैवै चायै बारै, उणां नै चाइजै 'क वे मिल-जुल’र रैवै।  इण सूं बढ’र मायड़भोम री दूजी कोई सेवा नीं हुय सकै।

स्रोत
  • पोथी : माणक (पारिवारिक राजस्थानी मासिक) ,
  • सिरजक : शंभुसेन सूं सत्येन व्यास री बंतळ ,
  • संपादक : पदम मेहता ,
  • प्रकाशक : माणक प्रकासण ,
  • संस्करण : जुलाई 1988
जुड़्योड़ा विसै