म्हारा परण्या नै सन्देसो

तू दे दे अे बादळी

तू दे दे अे बादळी

तू चालीजा बादळी।

म्हारा...

छांटा मत बरसाए बादळी

आखर तूं बरसाजे

आक न् जोड़ जोड़

तू सन्देसो पहुंचाजे

म्हारो है प्रीतम पूरब में

अब तूं ज्याए बादळी।

म्हारा...

चून्दड़ी रो साफो बाध्यां

चौड़ो है लिलाट

ठाकरां सी चाल ब्यांकी

मूछां आटा खाय

बे तो मुलकं मुलकं चालैला

आड़ी होजे बादली।

म्हारा...

सूना म्हारा महल माळियां

सूनौ है घर बार

घणी जोर की हिचकी आवै

बां बिन सूंनौ है तिंवार

बांका आबा री बधाई

तूं बता दे बादळी।

म्हारा...

स्रोत
  • पोथी : राजस्थानी गीत ,
  • सिरजक : आशा रानी लखोटिया ,
  • प्रकाशक : आशा पब्लिशिंग हाउस
जुड़्योड़ा विसै