आपरी उडीक नै निभावतां-निभावतां
रात आंख्यां मेह बूठो चावतां, नीं चावतां।
झीणो-झीणो नेह रचियो, रूप रो इण दीठ में
प्रीत री पुरवाई चुड़लो, रंगियो ज्यूं मजीठ में
धीमोड़ा-वायरिया, जा’र कै’जे मन मीत नै
हिवड़ै रै हुलास, म्हारी सपनां री पिरीत नै
फूलां जैड़ा बोल थारा, फूठरा लुभावता।
रात आंख्यां मेह बूठो, चावतां, नी चावतां।
बोल मीठा हेत रा उडीकै, उण प्राण नै
आंखड़ियां रा ओळमा, हेताळू मिजमांन नै
आंगणै सून्याड़ प्रीत पंथ नै निहारती
कोड कोई रात दिन सपनां में चितारती
हवळै-हवळै हंसता होठ, नेह नै रचावता।
रात आंख्यां मेह बूठो चावतां, नीं चावता।
कांईं कांईं कैवूं बात आंगणै उदासी री
सुण लेसी बाड़-कांटो, होसी बात हांसी री
थांरी मीठी बातड़ी, चितारतां घड़ी-घड़ी
मरतां गुड़तां जूण नै, लगाय देसूं लाकड़ी
ओळूं रा बिणजारा गासी, आवता’र जावता।
रात आंख्यां मेह बूठो चावतां नीं चावतां।
