दूहौ
मौसम तीनां रुत मुगट, प्रगट तिंवारां प्रीत।
च्यार दुहाळां थट चवूं, गहर त्रिकुटबंध गीत॥
गीत त्रिकुटबंध
धिन विमळ ऊजळ धोरिया, मुधरा स बोलै मोरिया,
कोरिया कुदरत खांत कर नै, भांत भांत भराव।
बड गयण घमकै बादळा, वीजळी चमकै चहुंवळा,
चहुंवळ पळळ वीजळ चपळ
कांठळ सजळ झळ कळ क्रगळ
बादळ विटळ टळ दळ बदळ
खळखळ प्रबळ जळ खाळ खळ
परनाळ ढळ भळ पैंपरळ
गळ ढगळ रळ वाखळ गुडळ
परमळ विमळ थळ वळ प्रघळ
सांभळ सकळ इळ पुळ सफळ
चळ अचळ मंगळ चाव॥
मौसम सियाळै थळ मही, कुळ ठंड हेमाळै कही,
भाखला कांबळ पटू भाळै, विचाळै मरुवाट।
रठ पड़ै तप मुख हरि रटै, चट चिलम ओटै चोहटै,
पट निपट चौहट हट प्रगट
सी रठ विकट तप निकट सट
महि कमठ वट चट खट सिमट
घर घरट कूवट अरट घट
कूमट मुरट छज बुहट कट
गघहट खिजट गोहट गरट
पणघट सुघट झटपट पलट
गैघट गहट दधमट घुमट
थट इमट थळवट थाट॥
अरड़ाट ऊठै आंधियां, वित रहै मुसकल बांधियां
रांधियां जीमण भिळै रेती, धसळ देती धूप।
इखियात ऊनाळै इसी, तपभोम सिध भाळै तिसी,
तिड़ भुंयड़ पड़ तावड़ तकड़
अंधड़ उपड़ पतझड़ अचड़
बड़ झँखड़ रूंखड़ गुड़ बड़ड़
एवड़ उमड़ अड़वड़ उरड़
खेजड़ सुरड़ चड़ तड़ खखड़
दीवड़ कंधड़ मुख नड़ दुझड़
घड़ टुकड़ चोपड़ घी घरड़
ऊजड़ पँथड़ खड़ भड़ अनड़
रड़वड़त रांगड़ रूप॥
चहुं दिस जमांनै चाव में, भल इष्ट साचै भाव में,
मेळा सुरंगा थळी मंडै, रळी करत हरेक।
ओठा स झुरकै आवतां, मगरियै धूम मचावतां,
भर निजर धर अम्बर भंवर
झंगर सिखर गिर निरझरर
ईसर गवर मिन्दर अगर
फरहर धजर तर हर फिकर
गेहर घुमर घर-घर गहर
मधकर लहर सरवर मुकर
सुर सिमर उर अंचर सधर
जमधर कमर किरमर जबर
नर हुनर मुरधर नेक॥
