मखमल बेळू रेत
रमै नित राम जठै
मुरधर म्हारो देस
झोरड़ो गाँव जठै
सोने जैड़ी रेत मसळता हाथा में
राजी हूता नांख दो मुट्ठी माथा में
रमता कान्ह गुवाळ बण्योड़ा खेता में
जीवण रा चित्राम मंड्योड़ा रेता में
मुळकै मूक सजीव
पड़या सैनाण जठै
मुरधर म्हारो देस
झोरड़ो गाँव जठै
नामी नगर नागौर नगीणा न्यारा है
भारत-भर में एक चमकता तारा है
जोधाणै नर तेज जिया तलवारा है
बीकाणा सिर मौड़ फणी फुफकारा है
जौहर जैसलमेर
जबर जुझार जठै
मुरधर म्हारो देस
झोरड़ो गाँव जठै
जंगी गढ चितौड़ धाक रणधीरां री
जगत सिरोमणी धाम पदमणी मीरा री
अमर अजर अजमेर हाकमी पीरा री
जैपर गुलाबी सैर हार लड़ हीरा री
जंतर-मंतर म्हैल
माळिया और कठै?
मुरधर म्हारो देस
झोरड़ो गांव जठै
ऊंचौ गढ गिगनार आबू हजारां में
लागै भीड़ अपार धूम बजारा में
कोटा बूंदी चमक चांदणी तारा में
पग-पग पर घनघोर
घुरया घमसाण जठै
मुरधर म्हारो देस
झोरड़ो गाँव् जठै
खेत करम नितनेम, धरम री पोथी है
साथी है, हळ, बैल पसुधन गोती है
फटी-पुराणी पाग ऊंची-सी धोती है
कामगरा किरसाण जागती जोती है
जीवै मैणत पांण
मानवी देख जठै
मुरधर म्हारो देस
झोरड़ो गाँव जठै
जीवण रो आधार एक ही खेती है
बिरखा म्हारै देस सदा कम होती है
बरसै सावण मास अणद कर देती है
बाजर मोठ गुंवार मूंग-कण मोती है
काचर, बोर मतीर
मेवा मिस्टाण जठै
मुरधर म्हारो देस
झोरड़ो गाँव जठै
करै कोयला डील तपै ज्यू धाणी है
पच-पच करदै रगत पसीनो पाणी है
जीवत बाळै खाल मूंढै मुळकाणी है
तूफाणा री ओट पळै जिन्दगाणी है
खड़यो तावड़ै लाय
धुवा धकरोळ उठै
मुरधर म्हारो देस
झोरड़ो गाँव जठै
लंबा काळा केस लूंब लट्ट नागणियां
धीमी धाल मराळ जिंया गजगामणियां
पतळी कमरां होठ गुलाबी-सी कळियां
मीठा मिसरी बोल कवल-तन कामणियां
पणघट पग पणिहार
पायल झणकार ऊठै
मुरधर म्हारो देस
झोरड़ो गाँव जठै
काम पड़या हर नार झांसी राणी है
मरजादा कुळ लाज अमर निसाणी है
घुरता घोर निसाण हुया अगवाणी है
नर सिमरथ मजबूत पगा में पाणी है
हसता-हसता सीस
सौंप दै बात सटै
मुरधर म्हारो देस
झोरड़ो गाँव जठै
माणस मूंघा जाण जिता जळ ऊंडा है
भिड़िया दै नीं पूठ पैंड पाऊंडा है
जीव थका लै खोस कुणा रा मूंडा है
छेड़या काळै नाग सरीखा भूंडा है
रण में बबरी सेर
सरीसा भभक उठै
मुरधर म्हारो देस
झोरड़ो गांव जठै
मखमल बेलू रेत रमै नित राम जठै
मुरधर म्हारो देस झोरड़ो गांव जठै
