जीवण नद यूं बहतो जावै
लहरां लेतो
मोजां देतो
सो बळ खातो
बो मदमातो—जीवण॰
सजळ सुहातो
सुखद लखातो
राग सुणातो
फाग उडातो—जीवण॰
चुळबुळ करतो
खूब उझळतो
छिण में रळतो
छिण में टळतो—जीवण॰
जिण सूं अड़तो
तकड़ो भिड़तो
आप अकड़तो
मन सूं मुड़तो—जीवण॰
चकरां चढ़तो
सफरां बढ़तो
चकर लगातो
टकरां खातो—जीवण॰
पासो देतो
खासो खेतो
चासो लेतो
सारां सेतो—जीवण॰
झुक झुक झुकतो
लुक लुक लुकतो
रह रह रुकतो
बह बह मुड़तो—जीवण॰
अग जग भरतो
नांह अखरतो
जरणा जरतो
झरणां झरतो—जीवण॰
