हां जी रे बन्ना रे
म्होंरा थे नवल बन्ना
हाय चुतर बन्ना
बन्ना थे तो पांच बरस रा होयग्या
थे दूध रे पतासा बन्ना पीओ सा
हां जी रे बन्ना रे
म्होंरा थे नवल बन्ना
हाय जोड़ी रा बन्ना
बन्ना दस बरस रा होयग्या
थे तो राज री इस्कुलां में पढग्या
हां जी रे बन्ना
म्होंरा जोड़ी रा बन्ना
हवे केसरिया बन्ना
बिच तीसां रे मोंय होया सा
थे तो राज री नौकरी बन्ना रैया सा
हां जी ओ बन्नी
म्हारी तूं नवल बन्नी
हाय चुतर बन्नी
थे तो हमिके छुट्टी में बेगा आवो सा
म्होंरे हार गळै रौ बन्ना लाओ सा
ए हां जी ओ बन्नी
म्हारी नवल बन्नी
हवे कोडीली बन्नी
म्है तो हार पतरसै बन्ना फोड़ूं रे
म्है तो गिण रै गिण दिनड़ा बन्ना तोड़ूं रे
ए हां जी ओ बन्ना रे
म्होंरा थे चुतर बन्ना
काळौ रे कोट सिवावांला
थांरै सोने रा बटण लगावांला
बन्ना ओलोड़ै खूंजे में रे मिश्री सा
म्होंरै बडोड़ी भोजाई सों बीसरी सा
बन्ना पेलोड़ै खूंजे में सोपारी सा
म्होंरा बन्नसा हीरां रा बौपारी सा
ए हां जी ओ बन्ना
म्हारी नवल बन्नी
हवे चुतर बन्नी
ए नथड़ी मांयला बन्नसा हीरा रे
म्होंरी इयै रे नणद बाई रा बीरा रे
बन्ना घस-घस पगला रे धोती सा
म्है तो बन्नसा री बाटां घणी जोती सा
ए हां जी ओ बन्ना
म्हारा चुतर बन्नी
म्हारा नवल बन्ना
गुळ री मंगा दो बन्ना भेली रे
ऊंची रे (न्यारी) चुणाय दो हवेली रे
म्है तो मैलां में बैठोड़ी रांधू भाजी सा
थांनै आयोड़ा नै कर दूं राजी सा
ए हां जी ओ बन्ना रे
म्हारा नवल बन्ना
हवे फौजी ओ बन्ना
म्होंरे बनड़ी-बन्ने रौ बन्ना जोड़ो रे
म्होंनै लाय दो गळै रौ नवसर डोरो रे
बन्ना थोंरे रे गळै में काचो तागो सा
थोंरी बनड़ी रे उडावे काळौ कागो सा
बन्ना अबके छुट्टी में बेगा आवो सा
म्होंरे पगड़ां री पायळ बन्ना लाओ सा
हां ओ बन्नी पायळ नै कंई निरखों
म्हैं तो बेतोड़ी पिणघट घणी निरखूं रे
ए हां जी ओ बन्ना रे
हाय जोड़ी रा बन्ना
हवे केसरिया बन्ना
स्हैर समदड़ी जाओ सा
म्होंरे लीलो रे लैंगो रे सीड़ाओ सा
बन्ना स्हैर अमदांणै भली जाईजो
म्हारे लीली थे साड़ी बन्ना थे लाईजो
ए हां जी ओ बन्ना रे
म्हारा चुतर बन्ना
हवे कोडीला बन्ना
अरे कानां रा रे गजमोती सा
म्है तो आडोड़ै घूंघट बन्ना जोती सा
ए हां जी ओ बन्ना रे
म्हारा चुतर बन्ना
हवे सिरदार बन्ना
तेल चम्पेली बिण जाऊंला
म्होंरे बन्नसा रे बालां में रम जाऊंला
बन्ना रुपियो रोत बिण जाऊंला
म्है तो बन्नसा रे बटुए में बेह जाऊं सा
ए हां जी ओ बन्ना रे
म्हारा चुतर बन्ना
हवे नवल बन्ना
म्है तो सुगन चिड़ी बिण जाऊंला
बन्नसा रे हाथै कोनी रेवूंला
ए हों जी ओ बन्नी
म्हारी तूं नवल बन्नी
ए बाज तो म्है बिण जाऊँला
थनै उडतोड़ी नै झंप परी खावूंला
ए हां जी ओ बन्ना रे
म्हारा चुतर बन्ना
हवे नवल बन्ना
ए भूरकी लादो म्होंनै झोटी सा
म्है तो आडोड़ै घूंघट जोती सा
