दूहा
राम नाम तप बांध सर, रांण घरौ करि राड़।
कुळ राकस रौ काटियौ, तीक्ष्ण तीर सूं ताड़॥
भ्रात भतीज भूका भया, लड़त लड़त सर लग्ग।
अब रावण रै ऊठगी, अंग-अंग मह अग्ग॥
बाप रांण बाकारियौ, जावत दीसत जैत।
पूत मेघ पधारीयौ, देख मरत कुळ दैत॥
छंद - रोमकंद
कुळ दैत कुटट्तह,कौम खुटट्तह, रांण रुठठ्तह टेर रुखी।
बख रांम बुठठ्तह, छक्क छुटट्तह, दळ्ळ दटट्तह देख दुखी।
लज लंक लुटट्तह, हाक फुटट्तह, झट्ट उठठ्तह मेघ भजै।
असुरारि उचक्कण, मेघ मचक्कण, सैन हुचक्कण साज सजै॥
बड़ बेग बढत्तह, चींग चढत्तह, खाग कढत्तह हाक करै।
दट दाट दढत्तह, थाट थढत्तह, वीर वढत्तह मौत वरै।
घट घाट गढत्तह, लाट लुढ़त्तह, काळ कुढ़त्तह कूक खिजै।
असुरारि उचक्कण, मेघ मचक्कण, सैन हुचक्कण साज सजै॥
रिणघोर हुवै, रण घोर हुवै, घणघोर घटाह छटाह घिरै।
हय घोर हुवै, हरि घोर हुवै, रथ घोर भटाह घटाह चिरै।
रुक घोर हुवै, भल घोर हुवै, सर घोर कटाह थटाह सजै।
असुरारि उचक्कण, मेघ मचक्कण, सैन हुचक्कण साज सजै॥
डक डाक डमक्कत, ढ़ोल ढ़मक्कत, छत्र छमक्कत छम्म छमै।
ठम ठम्म ठमक्कत, दुप्प धमक्कत, घंट घमक्कत घम्म घमै।
रण तेज रमक्कत, चख्ख चमक्कत, जोर हुमक्कत जीत कज्जै।
असुरारि उचक्कण, मेघ मचक्कण, सैन हुचक्कण साज सजै॥
धनुकार धगग्गग, साग सगग्गग, बांक बगग्गग छूट बढ़ै।
छड़ियाळ छगग्गग, तीर तगग्गग, चाप चगग्गग सर्र चढ़ै।
तिरसूल त्रगग्गग, ढ़ाल ढ़गग्गग, घोर घगग्गग गद्द गजै।
असुरारि उचक्कण, मेघ मचक्कण, सैन हुचक्कण साज सजै॥
करवाळ कड़ाक कड़ाक करै, खळ खेत खड़ाक खड़ाक खिड़ै।
तन तीर तड़ाक तड़ाक तिड़ै, गज गोट गड़ाक गड़ाक गिड़ै।
भड़ भाग भड़ाक भड़ाक भिड़ै, भिड़ भोड बड़ाक बड़ाक बजै।
असुरारि उचक्कण, मेघ मचक्कण, सैन हुचक्कण साजसजै॥
खखखख्ख खखख्, खखखख्ख खखख्, खखखख्ख खखख्ख खेह खिरै।
घघघघ्घ घघघ्, घघघघ्घ घघघ्, घघघघ्घ घघघ्घ धराह घुरै।
गगगग्ग गगग्, गगगग्ग गगग्, गगगग्ग गगग्गग गाज गजै।
असुरारि उचक्कण, मेघ मचक्कण, सैन हुचक्कण साज सजै॥
गळमुण्ड गुड़क्कत, लट्ट लुड़क्कत, धड़्ड़ धुड़क्कत पड़्ड़ धुजै।
कड़ हाड कड़क्कत, त्राण तड़क्कत, जोर जड़क्कत वीर मुजै।
फट अंग फड़क्कत, खिर्र खुड़क्कत, बाक बड़क्कत बट्ट बजै।
असुरारि उचक्कण, मेघ मचक्कण, सैन हुचक्कण साज सजै॥
खळ खून खळक्कत, रुण्ड रळक्कत, पंख वळक्कत आय पुगै।
जउगण्ण जळक्कत, मन्न मुळक्कत, चख्ख चळक्कत चूण चुगै।
भइरव्व भळक्कत, रक्त रळक्कत, धाप ढळक्कत डील धुजै।
असुरारि उचक्कण, मेघ मचक्कण, सैन हुचक्कण साज सजै॥
इण भांतिह अड़्ड़िय, लस्कर लड़्ड़िय, सैंगह सड़्ड़िय सर्र गुढ़ै।
पख अेकह पड़्ड़िय, नरक्क पेड़्ड़िय, बेपख पेड़्ड़िय सर्ग बढ़ै।
परवीणह पड़्ड़िय, घोण रगड़्ड़िय, छंदह घड़्ड़िय गुण्ण छजै
असुरारि उचक्कण, मेघ मचक्कण, सैन हुचक्कण साज सजै॥
