कतीक वार निरखूं
सूंप्योड़ी निजरां में उळझ्योड़ा
जोबन री कड़प लाग्योड़ा
अणचखिया मीठा भाव
हळदी रा रंग में डूब्योड़ा डोरां सूं
बांध्योड़ो जळम-जळम रो हेत
थारा उणियारा सामैं
डूबता सात-सात सुरजी
पण आज म्हारो मन उदास हुवै
जद अेवड़-छेवड़ निरखूं
अमूझता सपनां री बिछात
घुटयोड़ी सांसां में समायोड़ा
मोकळा चितराम
खिड़की सूं निरखूं नित
नाडी रै पाणी में धोयोड़ो अकास
बड़लै र हेटै
बाळू रेत में बणायोड़ा घरकूंड्या
रूंखा रै ओलै-ओलै जावती
थाक्योड़ी बाळद री चितकबरी गाय
जणा अपूठी होय’र
ताक में मेल्योड़ी थारी
गरद सूं भरयोड़ी तस्वीर देखूं
पण कतीक वार।
कतीक वार निरखूं
झळ लाग्योड़ा सा डूंगरां माथै
पीतळ रा तळिया सी उणमणी सांझ
गेरूं सूं रंग्योड़ो बूढो गांव
धीमी सी करोट लेवतो
अळसायोड़ो बायरो
मैं मैड़ी रै बारै
डोली माथै खुणी टेक’र
थांनै म्हारी निजरां सामैं जोवूं
म्हारी उणींदी पलकां सूं लूमतो अतीत
म्हानै पाछो खींचै
पण कतीक वार।
म्हारी चूड़ी री खणक सूं
रात री सूनियाड़ में
तरेड़ां चालै
म्हारी उफ़णती सांसां सूं
डूंगर, धरती धूजती लागै
पण कतीक वार!
पण कतीक चार!
पण कतीक वार!
