टूटोड़ी बंदूक

म्हारा मजबूत कांधा

अर लूंठी भुजावां री ओप,

सीनै माथै ऊग्योड़ा घाव

म्हारो गरब-गीरबौ,

अंतस में

हिलोळा खाय रैयो है घाव सुख।

लड़ाई री समाप्ती पछै

कीं सिपायां साथै

म्हें उडीकूं हूं

वां लोगां री बाट

जिका डरप'र खाली करग्या

भोमखंड

अर अबै वै इज

गिणैला म्हारा घाव

म्हने आदरैला।

व्हेय रयो है

म्हारै सांमेळै सारू

नुवैं गीत रौ पसाव

जुद्ध-गीत री चुन रै आधार।

म्हैं उडीकूं हूं बाट

म्हारा घाव गिण'र म्हनै आदरणाळां री

नवीं बंदूक देय'र दूजै किणी जुद्ध में भेजणियै री

हिवड़ै में घाव सुख हिलोरीजै है।

स्रोत
  • पोथी : झळ ,
  • सिरजक : पारस अरोड़ा ,
  • प्रकाशक : जुगत प्रकासण, जोधपुर ,
  • संस्करण : प्रथम संस्करण
जुड़्योड़ा विसै