वौ काळजौ थाम
दांत भींच
सिसकारी फूटण रै पैली
देखै हौ च्यारूं मेर
के रणखेत में पूठ माथै
औ वार कुण करियौ
भाई-सैण निजर आवै सगळा
औ दुस्मीं कुण?
किणरी ओट में छिप्योड़ा है बैरी
वै बेईमान हाथ किणरा है।
जिका छानै-छुपकै वार करै
सवाल जीवण-मरण रौ नीं है।
आदमी,
मात नीं खाई अजै लग
वौ लड़ै सांसां टूटण तांई
सवाल परख रौ है
सवाल सावचेती रौ है
उणनै साफ-साफ ओळखाण चाहिजै
के मोरां माथै जिका
झपटौ मारता नीं संकै
वै लोग कुण है?
