रोजीना नक्सै में कुरियोड़ौ नगर अेक
ऊगतै उजास समचै उठ खोलै
आपरौ रोजनामचौ अर
बाकी हिसाब री वसूली करण लागै।
सूतोड़ौ लारलौ हिसाब उठ जागै
घोड़ै रै चाबुक जोर सूं मारियां
सवारी पइसा वत्ता नी दै भाई
यूं ताव नै मत पाळ
सावळ रास नै संभाळ
घोड़ै री नाळ उखळगी
थारी लटकगी खाल
थनै मिळौ नी मिळौ
घोड़ै नै दाणौ देवणौ पड़ैला
वोट लाटणियै सूं पूछणौ पड़ैला
कद तांई रैवैला अै हवाल
सवाल पैतीस बरसां सूं जवाब मांगे है!
रावळे रै पसवाड़े हेटै दवियोड़ौ
थारौ दादौ
क्यूं नीं लैय सक्यौ सांयत री सांस
क्यूं ठाकर सा री चिलम हमेंस
बुझती उणरै मोरां माथै
कोईड़ां री मजबूती
क्यूं उणरी हाडकियां माथै परखीजती?
कूअै सूं पांणी खींचती
पिणियारी री डोयली में अटकर'र
वा किणरी ओढणी ऊपर आयगी ही?
जा पूछ थारा बाप नै के
किण हिसाब री भेंट चढ़गी ही
थारी मां?
खेतां गयौ बड़ौ भाई
पाछौ क्यूं नीं आयौ
खेत में लाधी दांतड़ली माथै
वौ खून किणरौ हौ?
किण में
कठै
कित्तौ
बाकी रैयगौ हौ हिसाब
पाछौ काढणौ पड़ैला
अेक-अेक पानौ लारलौ
पाछौ पलटणौ पड़ैला।
