म्हारी अलूणी बांहां सूं बंध्योड़ा
थारी गाढी प्रीत रा
रंगीला सपनां नै
ओळ्यूं आवण लागी!
सावण सा मीठा होठां पर
थारै हेत री लगायोड़ी लाली रो
रंग छूटबा लाग्यो
गोखां रै सारै
थारा हाथां सूं लगायोड़ी
सूरजमुखी रै फूल आग्या!
बाट बोवतां-जोवतां
सूक्योड़ी फळी सो
म्हारो मन तिड़कण लाग्यो
तूं कद आसी!
थारै बिना आ देह
बंजर धरती सी लागै
थारै बिना आ उमर
करज लियोड़ै धन सी लागै
थारै बिना अै गीत
जेठ री बळती
लूवां सी लागै
तूं कद आसी!
रोज थारै प्रीत रै देवरै पर
रूप री प्याली
चढातां-चढातां
म्हारी देह सूखगी
हेत रै चूरमै री पींडी
पड़ी-पड़ी सूखण लागी
तूं कद आसी!
थारी छाती री धड़कणां सूं
जीवती रहबाळी
कांचळी रा सांसां रा तार
उधड़बा लाग्या
खूंटी रै टंग्योड़ै पोमचै पर
लाग्योड़ो मूंघो गोटो
झूठो पड़बा लाग्यो
तूं कद आसी!
आज कोठै पर
मोर अर मोरणी
छतरी ताण्यां खड़्या है
म्हैं थारा सपनां रै पड़वै में
ऊभी-ऊभी
प्रीत रै दरपण में
मिलण री कलपना रा
केस सुळझा री हूं
तूं कद आसी!
आंगणो लीपती बेळ्यां
म्हारी निजरां सूं बणायोड़ी
थारी तसवीरां माथै
पग धरतां
म्हारो हिवड़ो फाटै
थारै दरद नै
कंठां सूं लगाय'र सोऊं
थारी गीली प्रीत सूं
सूखती जवानी नै
गीली करूं
तूं कद आसी!
टीबां पर चानणी रा
कूढा होग्या
खेतां में बाजरो
पोटां आग्यो
तूं कद आसी!
तूं कद आसी!!
