धम-धम बाजी
सईकां बाजी, बाजै अजूं ई
पण नीं फाट्यो म्हारो काळजो!
पुतियो पोतीजै
काळ रो कळमस चेरै
आंख्यां में पीळियो ऊंधीजै आअे साल!
रेत री पांख्यां बैठ देख्या
अठी-उठी रा खूंट
स्हैरां रा स्हैर नाप्या,
पूछ्यो चलवां-चैजारां रो
गादी ओपता सैणां नै...
म्हारी जूण सूं आंध्यां
कद तांई करैला खेला
आंगळी सूं लीखी जकी
नैर री मरोड़
कद हुवैला ऊभी पाळ
म्हारा आगोतर गिटतै
बिना दांतां रै बांबी सरीखै
बाकै आगै कद लागैला डाटो!
बड़कां री दीठ में
दीस्यो रातींदो
म्हैं ई लपेटी
चूल्है री राख री पाटी
पूरबलां धोंता-धोंता
पड़गी चांद्यां माथै...
दीनी समदरियै पूठ
बीं दिन सूं
पछवाड़ै पड़ियो कळपीजूं
पूरब-सा सोंवता धणियां
कीं तो बोलो..!
कतरा सईका आंता रै'सी
म्हारी आंख्यां में तिरवाळा तावड़ै रा?
