धोरां री आ तपती धरती, मीठी लागै सुहाणी जी
मेहड़लै री वेळा में आ, मन नै लागै लुभाणी जी
उड़-उड़ धूळ गळै सूं लागै, मैं तो कृष्णा थांरी जी
खेत चौक नै बीज बोयदो, नहीं तो मैं कुंआरी जी
बोयो बीज बरस्यो सावण, निदाणां री आ रुत आई
रुत घणी आ चोखी लागै, मीठो तेजो स्वर सुआई
आभो आय मिलियो धरती सूं, धरती सेज बखाणी जी
धोरां री आ तपती धरती, मीठी लागै सुहाणी जी
होळै-होळै हिलोरां लेवै, खेत औ बाजरियां रो
खाटा-मीठा चोखा लागै, स्वाद ओ काचरियां रो
बाजरी री रोटी माथै, ग्वांर फळी रो साग जी
खेजड़लै री ठंडी छाया, जीमण रो ओ भाग जी
धरती रा हां टाबरिया, धरती म्हानै पिछाणो जी
मेहड़लै री वेळा में आ, मन नै लारै लुभाणी जी।
