रामौतार रोजीनां देखै कै
अलमारी में
घणी चीजां भेळी व्हैगी
कांण-कायदां रा कोकसास्तर
इलम री सीरणी
घड़ी में डंक—
घड़ी में लंक लगावणियां रौ लूंण
निकांम सन्त-मुनियां री संताई रा
नख-दांत
धूतर नकटां रा साज-बाज
मांदगी रा मै'कमा
गीध-कागलां रै उकीलां नै हिमायतियां रा
उड़दी-तकमा
बिख-झाड़कां रा बिग्यापण
खेमसिंघजी री ख्यात रा
काळा कागद
राजबंस री रामांण
अर वीं नै बांचण वाळा भगतरांम
तैंतीस क्रोड देवी-देवतावां
रा चितरांम
सैंग बेकांम
कै तौ काठा जड़ो
खोट री इण अलमारी रा किंवाड़
के इण नै जमीन में गाडौ
रामौतार! भाया म्हैं तौ थांनै
भली ई सीख देवूं
थूं मतनां देख म्हांरै खांनी बाडौ-बाडौ!!
