टाबर
डरपै ई नीं
बीमार भी रैवण लागग्या है
वां रै हांसणै सूं
वां री हांसी
गिट जावै
लुगायां री लाज
अनै मरदां री मरदानगी
वै हांसै
तो ज्यूं हड़-बड़ हांसै
वां रा रगत रंग्योड़ा कूंचळा ई
जिकां नैं देख
रस बरसांवतो सावण
मुरझा जावै
लै’लावतै बागां में
भुंवण लागै भूत-भतूळिया
वां री हांसी
इण हांसतै-मुळकतै माहोल में
अेक मरम-भेदी हाहाकार है
कानां रा पड़दा फाड़ती
वां री हांसी
इण कुसमै रो
स्सै सूं मोटो सिस्टाचार है
कड़वो सांच तो ओ है
कै वां री आ हांसी ई
वां रो अचूक
अनै मारक हथियार है।
