थन्नै लागै कै थूं छोड़नै चली जासी म्हनै
फगत म्हैं तड़फतौ रैय जास्यूं
अर थूं जी लेसी सोरपाई साथै
कै म्हैं ई भटकतौ रैसूं दर-दर
अर थूं सोवसी सुख री सेज
कै थूं रम जासी थारी नवी दुनिया मांय
बीतेड़ै सूं पूठ फोरनै
अर मुगत हुय जासी उण छिणां सूं
जिका जीया कदी सागै-सागै आपां
कै पछै थारै आफिस रै कारजां मांय
गम जासी थूं इयां
कै नीं आसी कदै म्हारौ नांव ई आगै
कै भूल जासी थूं साचांणी हरमेस सारू
म्हारी रीस मांय कै प्रेम मांय कैयीजी
अर नीं कैयीजी सगळी बातां नै
करीजी अर नीं करीजी सगळी गळतियां नै
अर चली जासी इण भांत
कै पाछी नी आसी मुड़नै किणी सपनै मांय ई
थूं किण गुमान मांय है रिंकी टेलर!
अेकर आवणै पछै,
इण भांत नीं बहीर हुवै कदै ई परेम
भलां ई आपां कैवता रैवां
अर मानता रैवां, कै गयौ परौै वौ।
