सांवरयेरी सारगी
तूं सत् रंगी तूं बदरंगी
कठै तो बाजै पांव पेंजणी
कठै तूं लाधै अधनंगी॥
सुर साध्यां सुध सधै साध्वी
सुख रो सावण सरसै लो
मिनख मानखै मोती निपजै
रिमझिम मेहूलो बरसै लो
रूस्यां राज मिलैला धरसं लो
रूस्यां राज मिलैला कोनी
मिनख जूण री है तंगी
सांवरयेरी सारंगी...
पा-पा-पगल्यां धर कूंचां
मुळकाय बैठगी महलां में
लै चूक बचूकअलाप लियां
मल्हारां गाती ताना में
कठै बिलखतै आंगणियै
अध बणी छबीली छाना में
कठै तो रोटी राग रोवती
राग टूट गी ताना में।
बठै तूं औढै लाल दुसाला
कठै ना लाधै इक अंगी
सांवरयेरी सारंगी...
