राजस्थानी भासा बोल, मीठी मरुधर भासा बोल।
खुद री मायड़ भासा बोल, लूणी चम्बल वाळी बोल।
आडावळ री भासा बोल, खुद री भासा सडकै बोल।
राजस्थानी भासा बोल, मीठी मरुधर भासा बोल।
इणरा बोल घणां अणमोल, मीरां बोली इणरा बोल।
दादू बोल्यौ इणरा बोल, पन्ना बोली अै ईज बोल।
थूं क्यूं लारै रैवै बोल, झटपट मायड़ भासा बोल।
राजस्थानी भासा बोल, मीठी मरुधर भासा बोल।
हिवड़ै रा दरवाजा खोल, मायड़ मीठी वाणी बोल।
बाळपणां री बोली बोल, वा ईज भासा फेरूं बोल।
मिसरी जैड़ी भासा बोल, घणी सुहाणी भासा बोल।
राजस्थानी भासा बोल, मीठी मरुधर भासा बोल।
आछी लागै जैड़ी बोल, घरवाळां री भासा बोल।
भइसा बोल बाइसा बोल, काकोसा दादोसा बोल।
मासी मामी नानी बोल, पगैलागणौ इणमें बोल।
राजस्थानी भासा बोल, मीठी मरुधर भासा बोल।
आसीसां री भासा बोल, प्रेम भाव सूं मीठौ बोल।
हियै ताकड़ी पैली तोल, सा सा करतो सडकै बोल।
इब थूं मत व्है डावांडोल, बोल बोल थूं झट सूं बोल।
राजस्थानी भासा बोल, मीठी मरुधर भासा बोल।
अलगोझां री भासा बोल, सारंगी री भासा बोल।
मोरां धोरां वाळी बोल, कोयल कुरजां वाळी बोल।
इण में ई थूं इमरत घोळ, मायड़ भासा सडकै बोल।
राजस्थानी भासा बोल, मीठी मरुधर भासा बोल।
वीरां वाळी भासा बोल, जौहर वाळी भासा बोल।
पोळां किल्लां वाळी बोल, तोपां गोळां वाळी बोल।
कोट कूंगरा वाळी बोल, जाळी झरोखां वाळी बोल।
राजस्थानी भासा बोल, मीठी मरुधर भासा बोल।
संतां नै सूरां री बोल, भजनां वाळी भासा बोल।
गीतां वाळी भासा बोल, छंदां वाळी भासा बोल।
इण री गाथा ई अनमोल, चौड़ै धाड़ै करलै कोळ।
राजस्थानी भासा बोल, मीठी मरुधर भासा बोल।
मारवाड़ी मेवाती बोल, बागड़ सेखावाटी बोल।
मेवाड़ी ढूंढ़ाडी बोल, मालवी हाड़ौती बोल।
थांरी आछी बोली बोल, भासा राजस्थानी बोल।
राजस्थानी भासा बोल, मीठी मरुधर भासा बोल।
बजा-बजा नै कैदै ढोल, पैली मायड़ भासा बोल।
आ ई आपां री पैली ओळ, इण सूं मत कर टाळमटोल।
श्री वल्लभ रा साचा बोल, सगळा बोलो अै ईज बोल।
राजस्थानी भासा बोल, मीठी मरुधर भासा बोल।
