थारौ नी दोस
सफदर
थारौ नीं
इतिहास रै पोड़ा मांय
ईयां ई धधकता रैया
अगनी कुंड
अर ईयां ई जोतां रै
च्यानणै में
अडिग रैया मोटा भाखर
हाथ टूटता रैया
मूरत घड़ीजतै कारीगरां रा
तीखा सबदां रै नस्तर माथै
ईयां ई उठता रैया तूफान
अर मचता रैया घमसांण
बरसतौ रैयौ खून
जमीन रै काळजै में
धूजता रैया पग
नीलै आभै रा
रोही री सूनियाड़ में
बाजता रैया बाजा
कुदरत री झोळी सूं
फंकारता रैया काळा नाग
लीलतौ रैयौ बखत
सांच री उगती छीया नै
अर तसवीरां जड़ती रैयी
फूलां री मैकार
आदम जुग सूं
हुवतै इण जुद्ध रा सिपाही
सफदर, नी मिटै
थारी मौत रा मांडणा
नीं भूलै थारै
'हल्ला-बोल' री पीड़
जुग-जुग ताई
जद भी तणसी मुक्की
जद भी हुवैली
आंख्यां लाल
जद भी उठैली
हक री बात
सफदर!
थूं आतौ रैवैलौ याद
ईयां ई ईयां
थारौ नीं दोस
सफदर! थारौ नीं
म्हें सांच कैवूं।
