म्हारै घर अर
हड़मान जी री साळ रे
बीच में ओंटी खेजड़ी है
वा गरमी, सरदी, बरसात अर
हवा मांय सदा खड़ी रैवती
म्हां टाबर टींगर उण ऊपर
हींडा हींडता
लीली सांगरियां खांवता
पतझड़ मांय बणरा
सगळा पत्ता झड़ जांवता
नागी भूंगी खेजड़ी
अटल खड़ी रैवती
म्हानै बण ऊपर गरव हो
बा रस्तै मांय आंवती पण
कदैई किणी नै दुख नीं दैवती
न किणी नै सिकवा सिकायत करी
परदेस में बैठै नै समचार मिळ्या
ओंटी खेजड़ी नै काट बाढ़ दी है
बड़ो दुख हुयो
मिनख क्यूं पेड़ पौधां रो
नास कर पर्यावरण नै बिगाड़ै
आ गळती कर प्रकृति उजाड़ै
पण दूर बैठा कांई कर सकां
म्हनै सदा ओंटी खेजड़ी
याद रैसी जींवतो हूं जितै।
