म्हारा सै सपना बदळया

कांनां सुणीजता सुर बदळ्या

अंतस री बदळी आतमा

भावना नुवैं रूप प्रगटी

जुनौ बळग्यौ पांन पांन

कूंपळां नवीं निकळगी।

म्हारा सपना

आभै में उडणौ छौड

जमीं री गळिययां डोलै।

कांनां में

मिंदर री घंट्यां ठौड़

मिलां रा भोंपू बोले।

बिकी भावना

परसेवा री बूंदां बदळै,

अंतस में जलमी

नुवीं आतमा आंख्यां खोलै।

स्रोत
  • पोथी : झळ ,
  • सिरजक : पारस अरोड़ा ,
  • प्रकाशक : जुगत प्रकासण, जोधपुर ,
  • संस्करण : प्रथम संस्करण
जुड़्योड़ा विसै