होळै-होळै हांकौ पिवजी हिचकौ जाय सह्यौ नीं ओ
थोड़ौ थ्यावस राखौ गोरी अब घर आगौ कोनी ओ
मत चाल दिखावौ आसूदा बळद्यां री
भादरवै रा लीला उछळै गोरी म्हारी
कांईं चाल दिखावौ छैला म्हैं बौपारी कोनी ओ
थोड़ौ थ्यावस राखो गोरी अब घर आगो कोनी ओ
कड़ियां म्हारी पातळी म्हैं चणक पड़्या दुख पाऊं
आछी डरपी गोरी म्हारी छिण में वेद बुलाऊं
धन-गोळा टळ ज्यासी ढोला धोरै ढाळ ढबौ नीं ओ
थोड़ौ थ्यावस राखौ गोरी अब घर आगौ कोनी ओ
आ उतरी म्हैं नीचै देखौ पाळी चालूं ली
उतरैला मुकलावी मैंदी गेली गजब करैली
समझै बात भलां गोरी थूं कोनी टाबर नांनी ओ
थोड़ौ थ्यावस राखौ गोरी अब घर आगै कोनी ओ
मत देखौ थें लारै ढोला आगै खोचर खाडा
मनड़ौ मुड़-मुड़ देखै गोरी नेह रा भरिया नाडा
मत कैज्यौ पीवरियै भोळी बातां छांनी-मांनी ओ
थोड़ौ थ्यावस राखौ गोरी अब घर आगौ कोनी ओ
वै देखौ वै गोरी थारै सासरियै रा रूंख
म्हैं कांईं जांणूं म्हैं कद खाया सासरियै रा पूंख
इतरी तौ मांनौ बातड़ली थोड़ा पीव थमौ नीं ओ
थोड़ौ थ्यावस राखौ गोरी अब घर आगौ कोनी ओ
