टाबरपणै में
म्हे भैन- भाई
जे लड़ लेवता
तो म्हैं नीं लगावतो जेज
बाई रै थप्पड़ मारतां।
बाई बडी ही म्हां सूं
कैई बरस
अर जोरावर ई
पण नीं देवती
थप्पड़ रो पड़ूत्तर थप्पड़ सूं!
वा रोयनै
करती फरियाद
मां सूं...
मां म्हनैं डरावती-'‘अरे मरज्याणा!
भैन रै मार्यां
सिणियै में ऊग जावैला हाथ!’'
म्हैं उण बगत घणो डरपतो
बाई माथै नीं उठावतो हाथ
कैई दिन...
म्हैं सोचूं
मां कठै सूं सीखी
आ तजबीज
बाई नै मार सूं बचावण री!
क्यूं नीं सिखायो
बाई नै
पाछो थप्पड़ मारणो।
