सांची केवै संसदवाळा राजस्थानी भाषा कोनी।
1
सींधू रागों में संखनाद, छंदों में खड़गों रो पाणी।
गूंजण में केहर रो गरजण, रोबीली रजवट री राणी॥
खिमता खड़गां खड़कावण री, जूंझण जोधां रो जबर जोर।
मेटण मोतड़लो रा मटका, मरदां रै मूंछा री मरोड़॥
सुणतां जोहर जवाळा जागै, सुरगां रो माटी करै मोल।
बेमाता नैं हद बिलखावै, थळ री माटी रा वीर बोल॥
कीकर कैवै इणनै भाषा, आ जूंझारों रो जिन जोगी।
सांची कैवै संसदवाळा, राजस्थानी भाषा कोनी॥1॥
2
ईसर परमेसर रींझाया, हरिरस री बात न अण जाणी।
मेडतणी मीरां लियो मोल, गोपाळो गीता रो ग्यानी॥
कविचंद छंद रचिया कमाल, कंवळी करदीनी कुरबाणी।
अवनी री राखी आण अडिग, राजस्थानी बण रुद्राणी॥
रोटी खातर अमर्यो रोयो, बुझवा लागी सत री बाती।
रजपूती थिर राखण वाणी, आ गीता पीथल री पाती॥
कीकर केवै इणनै भाषा, आवेद पुरांणो री वोणी।
सांची केवै संसदवाळा, राजस्थानी भाषा कोनी॥2॥
