दोलड़ी जीभ
जेरोली सांस
माथै में ग्यान री गूमड़ी
पैरवां रै पोरां पर
ऊग्योड़ा भरूंटिया
आंख में अणूत
कांख में कुबाण
इसड़ै गुणाऊं
घड़ीज-जड़ीज
मिनख री मांदगी रो
इलाज करणियां
आपां रै साथै रस्सै बस्सै।
कदै कदास आसै-पासै
मोसमी कूकड़ा बण
दिस रो बोध करावण खातर
कुरड़ी माथै खुरड़ा खोतरतां
मेलो कुचरतां
घणकरी'क बार इणी भांत
जूण पूरी करतां करतां
टेम रो नेम भूल’र बांग दे नाखै
सूंवीं सिंझ्या, आधी रात
पो फाटण री कुणसी बात।
